Saamelaisten joiku
Saamelaisten joiku oon tärkkee kulttuuriperintö. Mutta mitä joiku oikhein oon?
Joiku – perintheinen saamelainen musikkilaji
Saamelaisten joiku oon yksi vanhiimista kansanmusikin lajiista Euroopassa.
Joiku oon tärkkee osa saamelaisten kulttuurii. Ennen joikathiin saamelaissii muisteluksii sukupolvelta toisele.
Joiku oon sen tähđen sekä muistelemista ja musikkii.
Joiku oon vieläki tärkkee taiđetlaji.
Joiku ja uskonto
Ennen pruukas noita joikata ja pelata trummaa uskonollisissa seremonioissa.
Nämät joijut olthiin ushein niin ko pitkät runot. Runot saatethiin muistela jonku ihmisen elämänhistoorian. Muutamisti net muistelthiin usheen sukupolven histoorian. Net saatethiin kans muistela ikivanhoista tarinoista.
📷 Tässä met näjemä trumman jossa oon eteläsaamelainen motiivi.
Joijun tunnusmerkit
Erityinen tapa pittäät ääntä oon yksi joijun tunnusmerkiistä.
Lisäksi joijussa oon melodia, rytmi ja tahti. Joikumelodia kulkkee ymmyrässä, eikä sitä ole jajettu värshyin niin ko tavalisissa lauluissa. Niinpä joijun saattaa aleti aloittaat uuđesti. Sen tähđen saattaaki sannoot ette joiku ei koskhaan lopu.
Joijussa pittää olla myötä sen ihmisen tahi assiin nimi jonka joikathaan. Niitä kuvvailhaan joikumelodiala. Joikkui saatethaan joikata kans eri dialektiila.
1 / 3
Joikata jonku
Se oon tavalista sannoot ette joikathaan ihmisen, elläimen eli elävän tahi maiseman. Ei pruukata sannoot ette joikathaan jonku ympäri.
Persoonajoiku
Se oon suuri kunnia saađa oman joijun skenkiksi.
Jokku saavat joijun ristiäsissä tahi rippijuhlassa. Joijun rytmi ja melodia muisteleevat paljon sen ihmisen personallisuuđesta ja ominaisuuksista kenen joikathaan.
Joiku kuvvailee ylheensä tyhä ihmisen positiivissii ominaisuuksii.
Persoonajoijun saatethaan kans laittaat jonku muistoksi tahi kunniaksi. Ko kuningas Olav aukaisi Sametingan vuona 1989, sai hän oman joijun. Kuningas Harald ja tronninki Sonja oon kans saanheet omat joijut.
Joikkuu saattaa pittäät kans friiastelhuun. Silloin halluu poika tahi tytär mainoot sinnuu, ja piian hän halluu ette hänestä tullee sinun rakastettu.
1 / 3
Elläinjoiku ja maisemajoiku
Elläimet ja elävät saattaavat kans saađa oman joijun. Melodia kuvvailee elläintä eli elävää, niin ko esimerkiksi sen kokkoo tahi liikumista.
Joijula saatethaan innostaat elläimii eli eläviitä olemhaan sepät, esimerkiksi laukkomhaan noppeemin.
Luontojoiku saattaa kuvvaila vuođenaikkaa, palkista tahi esimerkiksi vaaraa.
1 / 2
Joiku protestinna
Jokku joijut muisteleevat norjalaistamisesta jota saamelaiset jouđuthiin kokemhaan yli sađan vuođen aijan. Silloin heiđät työnethiin pohjaisemmaksi ja pakoitethiin kääntymhään kristinuskhoon.
Joikkuu piđethiin ko lujitethiin yhtheishenkkee ja protesteerathiin. Vaikka virkamiehet ja lähđetyssaarnaajat saatethiin vähäisen saamee, oli näihin protestijoikhuin punottu sannoi ja ilmaisui joita het ei ymmärtänheet.
Joiku oon kulttuuriperintö
Joikkamisen kielethiin silloin ko saamelaissii käänethiin kristilisyytheen. Joikkaamista piđethiin syntinä. Monissa aloissa joiku katos kokonhansa.
Joiku oon vanhaa saamelainen kulttuuriperintö jota oon tärkkee vieđä etheenkäsin. Het kekkä ei opi joikkaamista kotona, oppiivat sen ushein koulussa tahi kursila.
Joikekurs med Berit Alette Mienna
Nykyaikhainen joiku
Tääpänä oon taas uusi interessi joikhuun. Joiku anttaa inspirasuunii erilaisile musikkilajiile ja eri ikäjoukoile.
Joikkuu saattaa usseesti kuula radiossa tahi nähđä TVssä, esimerkiksi programiissa «Stjernekamp» tahi «Spellemannprisen» NRKssa.
1 / 2
Kalttiit:
- Gaski, Harald; Ledang, Ola Kai; Aksdal, Bjørn: joik i Store norske leksikon på snl.no.
Hentet 26. januar 2021 fra https://snl.no/joik
- NDLA (26.01.2021): Samisk litteratur
https://ndla.no/nn/subject:19/topic:1:186579/topic:1:196049/resource:1:190220?filters=urn:filter:f4581340-52f1-435d-8f99-d5de4e123f70
- Nordlige folk (26.01.2021): Joik
https://nordligefolk.no/sjosamene/kunst-musikk-litteratur/joik-2/
Kuva- ja video-oikkeuđet:
-
-
Jørn Pettersen / Riksarkivet
-
Åge Hojem / NTNU Vitenskapsmuseet (CC BY 2.0)
-
Getty Images / NRK Skole
-
Getty Images / Per Steinar Lyngstad – YouTube
-
Getty Images / Per Steinar Lyngstad – YouTube
-
Ukjent
-
Daniel Skog / Riddu Riđđu
-
Tore Sætre (CC BY-SA 4.0) / NRK – YouTube
-
