Om du skal bli tømrar, elektrikar, ambulansemedarbeidar, kokk eller blomsterdekoratør, kan det hende du kjende att eit av orda som blei nemnde over. Som fagarbeidar vil du bruke fagspråk når du kommuniserer i jobbsamanheng.

Fagspråk er ein måte å bruke språket på som dei som arbeider innafor eit fagområde, har til felles. Eit fagspråk innafor eit fagområde består av mange spesialuttrykk, framandord og eigne sjargongar. Ingen fagspråk er heilt like. Nokre gonger kan ein til og med bruke same omgrep, men gi det helt ulik tyding. Eit eksempel er omgrepet «merke». Det tyder nok vidt forskjellige ting for ein mediegrafikar og ein helsefagarbeidar.

Når ein skal skrive gode rapportar, treng ein å meistre fagspråket, ha kunnskap om sjangeren og kunne skrive på ein presis og forståeleg måte. Kokken som skriv at «Dagens rett er stekt kylling lever», eller møbelsnikkaren som skriv «Kunden ønskjer spise bord», verkar kanskje litt uprofesjonelle?

Vi kan jo le litt av slike eksempel, men rapportering og dokumentering er viktig for å sikre at dei arbeidsoppgåvene vi utfører, er faglege og forsvarlege. Det kan bli veldig dyrt for ein elektrikar å slurve med dokumenteringa, og kommuniserer ein helsefagarbeidar uklart, kan det faktisk få alvorlege konsekvensar for pasienten.

Å kunne formulere seg skriftleg og munnleg på en tydeleg og korrekt måte, med eit godt fagspråk, er derfor spesielt viktig for deg som kommande fagarbeidar.