Meiđän kaunis mailma – Oseania
Meiđän mailmassa oon lukemattomiita paikkoi jokka oon uniikkiita, mystissii ja kaunhiita. Luonto oon miljuuniitten vuossiin aikana haamustannu maisemaa meiđän ympärillä. Met ihmiset olema asettunheet tänne ja kaunistelheet maisemaa loistaavalla arkitektuurilla ja kaunhiila taiđettöilä.
Tässä artikkelissa näjemä joitaki esimerkkiitä Oseaniasta. Nyt sie pääset opastumhaan kahđeksheen erikoisheen paikkhaan Oseaniassa.
Bora Bora med palmetrær, blå himmel og blått hav.
1. Great Barrier Reef | Australia
Great Barrier Reef oon mailman suuriin korallipankki. Koralli oon pikkuinen kovakuorinen elävä joka assuu meressä.
Sielä missä nämät elävät kokkoonttuuvat laumoittain, synttyy korallipankki. Korallit näyttäävät niin ko färirikkhailta kukilta. Great Barrier Reef pittää sisälä 3000 tämmöistä korallipankkii ja sen saattaa nähđä aina avaruuđesta saakka. Mutta kaikkiin paras oon tutkiit korallipankkii ja sen yli 2000 kalalajjii klasipohjaisesta venheestä käsin, tahi sukaluspuvussa snorkkelin kans.
Great Barrier Reef oon niin ko valttaava akvariumi. Sielä oon ellääviitä koralliita ja anemooniita, ja klovnikalat ja haijit lymmyileevät färirikkhaissa koralliissa. Pelikaanit lenttäävät sinun pään ylitte, ja jos sinula oon lykky, saatat nähđä ko delfiinit tahi valhaat hyppiivät paaroin välissä.
Se oon fantastinen elämys sukalttaat ja snorklata Great Barrier Reefin vesissä, oletpa sie sitte kokenu sukalttaaja tahi halluut kokkeila sitä enimäistä kerttaa. Pankki oon valttaava, ja se on monta paikkaa mitä saattaa tutkiit. Veđessä oon mielyttäävä temperatuuri koko vuođen.
Jos sie olet erittäinki eeventyyrihaluinen saatat tutkiskella SS Yongalaa. Se oon matkustaajalaiva joka vajos vuona 1911. Tätä piđethään yhtenä mailman parhaimista hylyistä mihin saattaa sukalttaat.
1 / 3
Mann dykker i korallrev med røde fisker rundt seg.
2. Franz Josef-jäätikkö | Uusi Seelanti
Franz Josef-jäätikkö oon yksi Uusi Seelanin kolmesta jäätiköstä. Se oon 12 kilomeetterin pitukainen, ja se sijaittee tyhä muutaman sađan meetterin päässä rannikosta. Erikoista täälä oon se, ette sie saatat kävelä jäätikön päälä aamupäivälä ja pittäät sommaa rannala iltapäivälä.
Sie piian ihmettelet sen nimmee, mutta sen oon antanu yksi tyskäläinen joka tutki jäätikköö vuona 1865. Hän nimitti jäätikön Öystäriikin keisarin Franz Josef I:n jälkhiin.
Franz Josef -jäätikön tunnethaan kans nimelä «Ka Roimata o Hine Hukatere». Se oon maorin kieltä ja meinaa Hine Hukateren jäätynheet kyynelheet. Maorit oon Uusi Seelanin alkupöräiskansa.
Legendan jälkhiin lumiprinsessa Hine Hukatere rakastui tavalisheen mieheen nimeltä Wawe. Het lähđethiin ylös Aorangi-vaarhaan missä heimojumalat assuuvat. Het pyyđethiin ette jumalat tekkeevät lumiprinsessasta ihmisen. Mutta kostonankara ilmanjumala Tawhirimatea tölmäs Wawen alas vaaran lajelta ja suorhaan kuolemhaan. Jäätikkö syntyi Hine Hukateren kyynelistä.
Franz Josef -jäätikkö liikkuu jopa 50 senttimeetterii päivässä, mutta niinki oon tapattunnu ette jäätikkö oon liikkunu niin paljon ko nelje meetteerii yhđessä päivässä.
Jäätikön alla oon luolaverkostoi, jäätikköhalkkeemii ja tunneliita mikkä muuttuuvat päivästä toisheen. Kaksi jäätikkövajelusta ei sen tähđen ole koskhaan samanlaiset.
1 / 3
Franz Josef isbreen på New Zealand.
3. Samoa | Tyvenmeri
Samoa oon pieni saarijoukko Tyvenmeressä. Pääattraksuuni oon saaren fantastinen luonto: krystalinkirkas vesi, valkkeet rannat, rehevät mettät ja vilkkhaat kurkkiit.
📷 Kuvateksti: Tradisunelli rantahuonet Samoassa.
To Sua Ocean Trench oon mielenkiintoinen vulkkaaninen fenomeeni. Se pittää sisälä kaksi valttaavaa reikkää jokka oon siđottu yhtheen luolala.
Yksi reijistä oon tääpänä syvä basenki missä sekä turistit ja paikaliset uivat.
Samoan pääkaupunki Apia oon Upola-saarela. Sielä oon lummoova, trooppinen hamina, ja se oon paras paikka opastuut samoalaisheen elämäntaphaan. Samoan kulttuurisentterissä saat nähđä autenttissii käsitöitä, ruvanlaittoo, ja kans sepän tatuvöörin tekemässä tatuveerinkkii rohkeile turistiile.
Apia oon paras paikka kokkeet fiafia-illan jossa saat nauttiit tradisunellista laulusta ja tansista, färirikkhaista kostyymiista ja herkulisesta keskipäivästä.
1 / 4
Strand på Samoa med tradisjonelt strandhus.
4. Lake Hillier | Australia
Lake Hillier oon järvi joka sijaittee Middle Island -saarela, aivan Australian vestarannikon ulkopuolela. Se oon kirkkhaanroosa koko vuođen. Toistaiseksi tutkiijat ei ole sikkarit siitä miksi se oon niin.
Jokku luuleevat ette se oon veđessä olleevan bakteerin takia, ko taas toiset meinaavat ette syy siihen oon mikroalgi Dunaliella salina.
Järvi tekkee vaikutuksen ja se oon uskomaton näky, olletikki siksi ette se sijaittee tyhä muutaman meetterin Tyvenmerestä joka oon yhtä sininen ko se aina oon ollu. Kontrasti näitten kahđen välilä oon siksi sekä hämmästyttäävä ja fasineeraava ylhäältä kattottunna.
Lake Hillier ei ole mailman ainua roosa järvi, mutta se mikä tekkee siitä uniikin oon se, ette veđen färi ei muutu jos vettä kaajethaan flakshuun tahi klashiin.
Lake Hillierin löysi briittiläinen eeventyyräri Matthew Flinders vuona 1802, ja se sai nimen William Hillierin jälkhiin. Tämä oli myötä Flinderin reissula, mutta valitettavasti hän kuoli sen aikana.
Lake Hillier oon pieni järvi. Vain nuoin 600 kerttaa 250 meetterii. Järvestä kaivethiin suolaa nuoin kuuđen vuođen aijan, mutta sen häyđythiin lopettaat ko havaithiin ette suola oli niin myrkylistä ettei ihminen piđä syöđä sitä.
1 / 3
Lake Hillier i Australia med sitt rosa vann, ligger rett ved siden av Stillehavet som er knall blått.
5. Rotorua | Uusi Seelanti
Rotorua oon kaupunki Uusi Seelanin pohjaissiimala saarela. Täältä löyttyy mailman rauhalissiimppii kuumii lähtheitä ja rapakkokylppyi ja yksi mailman parhaista lattuista offroadsykläämistä varten.
Kaupungin tunnethaan kans truiskuuvasta geysiristä. Geysir oon kiehuuvaa vettä joka truiskuu maasta ylös. Tämä tapattuu vähhiinthään 20 kerttaa janturissa! Ja niin ko se ei olis nokko, täälä saatat kokkeet kans sattoi vuossii vanhaata maorilaista kulttuurii.
Rorotua oon keskelä tulivaara-allaa ja se oon itte assiissa aikamoinen etu. Kuuma gassi maan sisästä puristuu ylös vaarasta ja lämmittää alan luonoliset suvanot. Veđen temperatuuri täälä oon 35 graadii.
Halluutko freistata rapakylppyy? Tämmöinen kylpy saattaa tehđä hyvvää sinun ihole. Lisäksi saatat kattoskella mailman suuriinta kuumaa köngästä. Enniin osa siitä mitä Rotoruasta löyttyy oon siis kuumaa!
1 / 3
6. Sydney | Australia
Sydneytä piđethään yhtenä mailman kaunhiimista ja mahtaaviimista kaupungiista. Ennen kaikkee ikoonisen Sydney Harbour Bridge -sillan ja oopperahuonheen takia.
Usheet tuntteevat sillan sen mahtaavista fyyrvärkkeriistä uuđenvuođenaattona. Oopperahuonet oon Australian tunnetuin maamerkki.
St. Maryn katedraali oon kans vierailun arvoinen paikka. Ennen kaikkee saatat kattoskella klasimaalauksii ja kuunela kirkkokuoron lauluu sunnuntaisin. Fantastinen valonäyttely kirkastaa kirkon jouluna.
Sydneyssä saatat kokkeet paljon. Täältä löyđät Royal Botanic Gardenin missä oon linttui, päivälinttui, reptiiliitä ja kalloi.
New South Walesin taiđetgalleriassa kannattaa kans käyđä.
Jos sie olet auringon ja kesän ystävä, niin Sydneyssä oon yli 100 ranttaa. Tunnetuin taittaa olla Bondi Beach.
1 / 3
7. Uluru | Australia
Sie saatat nähđä keskelä laakkeeta ja kuivaa auttiita jotaki aivan erityistä. Uluru, jota käskethään kans Ayerin Rockiksi, oon populääri kohđet turistireisuile. Se ulottuu 348 meetterin korkkeutheen.
Silloin ko australialainen aurinko paistaa tähän vaarhaan, näyttää se siltä ette se kiiluu oransinna ja punaisenna.
Se oon helppo ymmärttäät miksi Australian alkupöräiskansa, aborigiinit, omistaavat vaaran. Heile se oon pyhä paikka.
Sađat tuhanet turistit oon vuosikymmeniitten aijan kiikkunheet Ulurun lajele, muun myötä kattomhaan auringonnoussuu lajelta. Se alkoi olla liika paljon turistiita tässä pyhässä paikassa, ja vuona 2019 kielethiin kiikkumisen lajele.
Monet kuitenki käveleevät vaaran juuren ympäri. Se oon kävelymatka joka oon 9,4 kilomeetterin pitukainen, ja matkala saattaa nähđä fasineeraavii luolamaalauksii joita aborigiinit oon maalanheet yli 5000 vuotta aikkaa.
Vaikka Uluru oon keskelä auttiita, oon vuorela runshaasti elävii. Täältä löyttyy yli 170 lintulajjii, kymmenii reptiililajji ja yli 20 eri tuumielläintä. Jos sinula käypi tuuri, saatat nähđä kenguruita tahi harvinaissii, färirikkhaita linttui.
1 / 3
Det røde fjellet Mount Connor i Australia
Lähtheet:
- 101 steder du må oppleve (før du dør) (2020)
Orage Forlag AS
Kuva- ja video-oikkeuđet:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
