Men det er problem med slike bilar også. Nesten alt hydrogenet som blir laga i USA, kjem frå naturgass som er eit fossilt brensel. Hydrogen er også eit farleg stoff, fordi det har lett for å eksplodere. Det er altså ikkje enkelt å sikre at hydrogenet er trygt når bilen bevegar seg i høg fart bortover vegen.

Sjølv om bruk av hydrogen byr på ein del problem, kan bilane likevel fungere veldig bra i framtida. Det blir bygd stadig fleire fyllestasjonar for hydrogen rundt om i Europa. Håpet er at det skal gjere det lettare å køyre bil med brenselcelle framover.

Noreg viser veg 

I Noreg er elbilar spesielt populære, og det ser ut til at stadig fleire vel el og hybrid i staden for bensin og diesel når dei skal kjøpe ny bil. Nesten halvparten av alle bilar som vart selde i Noreg i 2019, var miljøvennlege bilar. Men også andre måtar å reise på blir meir miljøvennlege. Stadig fleire tog rundt om i verda blir elektriske.

Vindkraft  

Vindmøller leverer i dag 3,7 prosent av elektrisiteten på jorda, og det blir bygd stadig fleire.  Det blir også satsa stort på å byggje vindmøller på sjøen.

Tidevasskraft  

Tidevatnet kjem og går to gongar i døgnet, og det inneheld mykje energi. Denne energien har vore vanskeleg å utnytte, men ny teknologi har gjort det lettare. Ei undersøking frå 2001 viser at tidevatnet ved kysten av USA kan gi over 450 gigawatt med straum. Det er ein fjerdedel av all straumen som trengst.  

Kraft frå jordvarme 

Å bu ved ein vulkan kan by på utfordringar, spesielt når det skjer utbrot. Men land som Island og Japan bruker desse varmekjeldene til å lage elektrisitet. Geotermisk kraft er miljøvennleg, billig og påliteleg. Det fungerer ved at ein pumpar vatn ned under jorda, og der gjer varmen frå jorda at vatnet blir til damp. Denne dampen driv ein turbin som lagar straum.

Mikrogenerering 

Systemet vi har no, med gigantiske kraftverk og eit straumnett som dekkjer heile landet, er mindre effektivt enn det ein kallar eit mikrogenereringssystem. I eit slikt system lagar vi alle noko av vår eigen straum der vi bur.

Solkraft 

I California, Spania og Japan er solkraft allereie billigare enn straum frå straumnettet gjennom store delar av året. I Europa og Kina prøver ein også å leggje til rette for meir bruk av solkraft. Nokre selskap har utvikla ein spesiell type glas som kan samle solenergi. Dette kan brukast som vindauge og takvindauge eller til og med som fortau. Solkraft passar godt til å varme opp og kjøle ned huset du bur i. Strålane til sola kan brukast til å varme opp vatn, mens varmepumper som blir drivne av sola, kan gjere lufta i huset kaldare. 

Geotermisk varmepumpe 

Liknande teknologi kan brukast til å hente varme frå bakken. Temperaturen under bakken held seg mellom 7 og 24 grader året rundt. Om vinteren kan ein trekkje opp varme, og om sommeren kan varmen sendast ned. Systema er dyre å montere, men du vil spare mange tusen kroner på straumrekninga over tid.