I enkelte område må ein pumpe opp grunnvatn. Dette er vatn som ligg langt nede i jorda. Viss alt grunnvatnet blir pumpa opp, står ein utan vatn. Då er det ikkje lenger mogleg å bu og dyrke jorda i området. Dette er ei utfordring med moderne landbruk.

Auka avlingar

Ei anna utfordring med landbruket er at ein ønskjer å utnytte det jordstykket ein eig mest mogleg. Til slutt kan jorda “gå tom” for næring.

Sprøytemiddel og gjødsel blir brukt for å få større avlingar. Gjødsel gir næring til jorda, og sprøytemiddel gjer at insekt og skadedyr held seg unna.

Økologisk landbruk

Mange er redde for at sprøytemiddel kan føre til helseskadar hos menneske.

Nokre bønder satsar derfor på økologisk landbruk. Dei bruker ikkje sprøytemiddel og kunstgjødsel, og dei forureinar ikkje naturen. Det er mange som ønskjer å kjøpe økologisk mat, fordi slik mat ikkje inneheld giftstoff. Ulempa er at maten ofte er dyrare enn annan mat.

Nok kjøtt til alle?

Befolkninga i verda aukar. Klarer vi å produsere nok mat?

For å produsere 1 kilo storfekjøtt blir det kravd 7 kilo korn. Mange meiner derfor at vi bør ete mindre kjøtt og meir korn og grønsaker, slik at det blir nok til alle.

Laboratoriekjøtt

Forskarar har klart å dyrke fram kjøtt i laboratorium. Dei trur at dette kan løyse mange av utfordringane. Mange er likevel skeptiske til kjøtt som ikkje kjem frå levande dyr. Eit anna alternativ er at vi må ete meir insekt framfor kjøtt.