Vasskraft

I Noreg produserer vi mykje elektrisk straum. Det blir brukt vasskraft frå fossar og større elvar. Vi har mykje straum her, men vi bruker òg mykje. Med demningar samlar vi opp vatnet – så blir det sleppt  ut ved behov. Kraftverka treng òg vegar, straummaster og kraftlinjer.

Når ein byggjer demningar, hopar det seg opp med vatn på den eine sida. Det kan skade dyre- og plantelivet i området. I nokre land har ein bygd så store demningar at små byar har blitt lagde under vatn. Folk har måtta flytte frå heimstaden sin.

Vindkraft

Har du vore på ferie i Danmark og sett alle vindmøllene? Vind kan bli brukt for å lage elektrisk straum. Tyskland og USA har også mange vindmøller. Noreg har nokre, men ikkje mange. Vind er ein fornybar ressurs. Han forureinar ikkje. Vindmøller er likevel ikkje berre positivt. Dei er veldig høge og tar stor plass. Dei lagar ein del støy. For fuglar kan dei vere farlege.

Bølgjer og geotermikk

Nokre kilometer under jordoverflata er det ein varm og glødande masse. Han blir kalla mantel. Denne varmen kan vi hente og bruke på overflata. Det blir kalla geotermisk energi.

Det er òg noko som heiter bølgjekraft. Det er energien i rørsla til bølgjene, og denne kan bli gjort om til elektrisk energi. Men det kostar mykje å lage elektrisk energi på desse måtane, og det er ganske vanskeleg å få til. Derfor er dei lite brukte i dag.

📷  Varm kjelde som kokar over på Island, viser at temperaturen under jordoverflata er ganske høg.