Meiđän kaunis mailma – Amerikka

Meiđän mailmassa oon paljon jännittääviitä paikkoi mikkä luonto oon haamustannu. Met ihmiset olema kans luonheet kaunhiita paikkoi.

Tässä artikkelissa sie opastut 10 erikoisen paikan kans Amerikassa.

Las Vegas
Las Vegas

1. Vaphauđenpattas | USA

Vaphauđenpattas seissoo saarela Liberty Island joka oon New Yorkin ulkopuolela. Pattasta käskethään kans Vaphauđen jumalattareksi. Sen tunnethaan koko mailmassa.

 

Jos sie halluut kattoot sitä likeltä käsin, sie saatat ottaat lautan saarele missä pattas seissoo.

Pattas oon melkhein 100 meetterin korkkee.

Jos halluut, sie saatat mennä trappui pitkin ylös huipule. Huipule oon sija tyhä kahđeletoista ihmiselle kerrala.

Pattas oli skenkki Franskalta USA:le. Sen paljastethiin vuona 1886.

Vaphauđenpatthaan oikkeessa käđessä oon fakkeli ja vasemassa käđessä oon taulu. Nämät oon symboolit siitä ette kaikila oon oikkeus elämhään vaphauđessa.

Forrige avsnitt

1 / 3

Neste avsnitt
Frihetsstatuen New York
Frihetsstatuen New York

2. Machu Picchu | Peru

Inka-kansa asui monta sattaa vuotta aikkaa Machu Picchussa. Se oli silloin fantastinen kaupunki, mutta tääpänä oon tyhä rauniot jäljelä.

Kaupunki oli tuntematon usheimille siihen asti ko Hiram Bingham havaitti sen vuona 1911.

Inkat oli rikkhaat ja mahtaavat, ja rakenethiin Machu Picchu 1400-luvula. Spanialaiset vallathiin Inkariikin vuona 1532. Inkat ei pystynheet puolustamhaan itteensä spanialaissii sotamiehii vasthaan.

Monet tuhanet turistit matkustaavat tääpänä Machu Picchhuun kattomhaan ikivanhaata kaupunkkii. Sie häyđyt juttaat sinne vanhaata inkapolkkuu myöten. Polku kulkkee jungelin läpi vaarale mikä oon yli 2000 meetterin korkkeuđessa meren pinnalta.

Sie saatat mennä kans tookila tahi bussila sinne.

Tiesitkö ette … ?

Uuđeman tutkimuksen jälkhiin saattaa Machu Picchu olla vanhempi ko arkeoloogit oon luulheet.

Forrige avsnitt

1 / 4

Neste avsnitt
Machu Picchu
Machu Picchu

3. Niagara Falls | Pohjais-Amerikka

Niagara Falls oon hirmuinen kurkkii USA:n ja Kanadan rajala.

 

Kurkkiisseen kuuluu oikkeestansa kolme eri kurkkiita: Horseshoe Falls, American Falls ja Bridal Veili Falls.

Tuhanet turistit matkustaavat kuulun kurkkiin tykö joka vuosi. Monet halluuvat ottaat selfien kurkkiin eđessä.

 

Sie saatat kävelä tahi ajjaat piililä kurkkiin tykö.

Kurkkiista huilaa alas 2400 kubikkimeetterii vettä joka sekunti.

 

Kubikkimeetteri vettä oon sama ko 1000 liitterii.

Forrige avsnitt

1 / 3

Neste avsnitt

4. Galápagossaaret | Equador

Galápagosaarila Ecuadorin rannikolla oon uniikki luonto eläville ja kasvuile.

Saaret saathiin Charles Darwinin valthaan ko hän kävi sielä vuona 1835. Sielä hän sai ideen evolusuuniteorihaan.

Näitten saarten elläimet ja kasvit oon eđistynheet miljuuniitten vuossiin aikana ja paljot niistä löyttyyvä tyhä täältä.

 

Erikoiset elläimet oon muun myötä galapagospingviini, meri-iguaani ja linnut millä oon siniset jalat.

 

Saaret oon saanheet nimen hirmuisen ison elefanttikilpikonnan jälkhiin. Kilpikonna oon spanskaksi galápagos. Elefanttikilpikonna saattaa elläät yli 100 vuotta.

Se oon populääri sukalttaat saarten krystallikirkkhaassa veđessä. Merestä löyttyy yli 2900 eri lajjii.

 

Kliima oon kuuma ja kostee ympäri vuođen.

Forrige avsnitt

1 / 3

Neste avsnitt
Galapagosøyene
Galapagosøyene

5. Mount Rushmore | USA

Mount Rushmore oon vaikuttaava näkymä. 400 työteliijää hakkas 14 vuotta neljen presidentin naamoi vaarhaan.

 

Naamat oon 18 meetterin korkkeet.

Nämät nelje presidenttii oon vestamaitten histoorian tärkeitten persooniitten joukossa.

 

Vasemalta näjemä George Washington, Thomas Jefferson, Abraham Lincoln ja Theodore Roosevelt.

Alkupöräiskansat jokka asuthiin Amerikassa ennen ko eurooppalaiset tulthiin, pittäävät tätä vaaraa pyhänä. Het meinaavat ette Mount Rushmore oon pilanu luonon.

Tiesitkö ette … ?

Legolandissa oon Mount Rushmore jonka oon pykätty 1,5 miljuunasta legoklossasta.

Forrige avsnitt

1 / 4

Neste avsnitt

6. Rio de Janeiro | Brasiili

Rio de Janeiro saapi enniiten kävijöitä Brasiilissa.

 

Tässä suurkaupungissa oon valkkeet rannat ja korkkeet vaarat.

 

Usheimat turistit käyvät Copacabanassa joka oon neljen kilomeetterin pitukainen ranta.

Ko sie käyt Riossa, sie piđät ottaat köysibaanan Sokkerilajele. Tämä kaunis vaara oon 396 meetterin korkkeuđessa meren pinnalta. Sieltä saapi fantastisen näkymän.

Vuođen tärkkein tapattuma oon fepruaarikuun karnevaalit. Silloin tansathaan sambaa ja juhlithaan janturin ympäri.

Kans valttaavan kokoisheen Kristuspatthaasseen kannattaa nähđä. Tämä seissoo toisela vaaranlajela mikä oon 710 meetterii meren pinnan yläpuolela. 

 

Ette pääset sinne, sie piđät matkustaat tookila ja sitte kävelä vielä 220 trappuu ylös. Tämä oon kieltämättä sen väärti. Näkymä oon niin kaunis ette häyttyy piđättäät hengityksen!v

Forrige avsnitt

1 / 3

Neste avsnitt

7. Grand Canyon | USA

Grand Canyon oon lakso jonka Coloradojoki oon luonu. Lakson seinissä näkkyy 40 eri maatyyppii.

 

Lakso oon liki 450 kilomeetterin pitukainen.

Kesälä oon hirmuisen kuumaa, mutta sieltä löyttyy kans paikkoi joissa oon kalvheita

Ko lumi peittää maiseman, tullee maisemasta niin ko kaunis joulukortti.

Forrige avsnitt

1 / 3

Neste avsnitt
Grand Canyon
Grand Canyon

8. Sađetmettä | Etelä-Amerikka

Amazonas oon mailman suuriin sađetmettä ja se täkkää yli 5 miljuunaa kvadraattikilomeetterii. Se oon suurempi ko EU. Mettä ulottuu yhđeksheen Etelä-Amerikan maahan.

Sađetmettässä assuu tuhanssii eri elläin- ja elävälajjii. Jos sinula oon lykky, saatat nähđä pikkuapinan keisaritamarin, jaguaariita, krokotilliita ja roosanfärissii delfiiniitä.

Forrige avsnitt

1 / 2

Neste avsnitt
Amazonas
Amazonas

9. Las Vegas | USA

Las Vegas oon mailman kirkkhain paikka ko maapalloo kattoo avaruuđesta käsin.

Kaupunki oon täynä valloi, glitterii ja somanpittoo. Monet turistit reissaavat sinne pellaamhaan kasinoissa ja pitämhään sommaa.

 

Kaupungissa oon tunnetuitten artistiitten konserttiita  ja restauranttiita kaikista mailman nurkista. Sie saatat shoppaila fiiniissä puohiissa ja nauttiit elämästä spassa.

 

Forrige avsnitt

1 / 2

Neste avsnitt

10. Volcán Arenal | Costa Rica

Costa Rican tulivaara Arenal oon 1670 meetterii korkkee. Siitä ei ole monta vuotta aikkaa ko tulivaara oli aktiivinen ja purkkautui yli 40 kerttaa päivässä.

 

Nyt se päästää tyhä savvuu ja saapi maan tärisemhään vähäsen.

Tulivaara oon korkkee ja se näkkyy selvästi Volcán Arenalin kansalistarhaassa.

 

Se ei ole mahđolista mennä itte tulivaaran pääle, mutta sen saattaa nähđä ilmasta käsin.

Forrige avsnitt

1 / 2

Neste avsnitt
Vulkanen Arenal
Vulkanen Arenal

Kalttiit:

  • 101 steder du må oppleve (før du dør) (2020)
    Orage Forlag AS
  • Siverts, Henning; Opsvik, Tor: Inkariket i Store norske leksikon på snl.no.
    Hentet 2021 M08 25 fra https://snl.no/Inkariket

Kuvat:

    1. Getty Images
    2. Getty Images
    3. Getty Images
    4. Getty Images
    5. Getty Images
    6. Getty Images
    7. Getty Images
    8. Getty Images
    9. Getty Images
    10. Getty Images
    11. Getty Images