Meiđän kaunis mailma – Aasia
Meiđän mailmassa oon paljon jännittääviitä paikkoi.
Tässä artikkelissa sie opastut kahđeksheen erikoisheen paikkhaan Aasiassa.
1. Shiraz | Iran
Iranissa oon paljon kattomisen arvoista. Monet oon pölänheet reissata tähän kaunhiisseen maahan, mutta viimi vuosina maa oon ollu turvalinen.
Tämä kuiten muuttui vuona 2022. Norjan esivallat neuvoovat nyt ette Iranhiin ei kannata reisata.
Iranissa oon joitaki mailman vanhiimista maamerkiistä. Shiraz oon kaupunki kaiken tämän keskelä.
Nasir al-Mulk-moskean satheenkaariklasit oon hirmu kaunhiit. Näkö loistaa klassiin läpitte. Ko sie seisot moskeassa, se oon niin ko sie olisit korurassiin sisälä. Moskean pykäthiin 1800-luvun lopussa.
Likelä oon Shah Chéraghin hauta. Se oon 1100-luvulta.
Sielä oon smaragdinvihrinen kamari täynä pienii peilii mikkä kiilttäävät ko net fangittaavat valon. Tämä oon yksi kaunhiimista kokemuksista koko islamilaisessa mailmassa.
1 / 3
Moskeen i Shiraz
2. Pamukkale | Turkki
Semmossii valkkeita kalkkikivilompoloita, joita saatat nähđä Pamukkalessa, ei löyđy muuvalta mailmasta.
Pamukkale oon Turkissa ja se oon uskomaton näky. Luonoliset, kuumat lähtheet oon pumpanheet kalsiumivettä maan pinnale 14 000 vuotta. Vesi oon huilanu alas vaarankylkkee, höyrystynny ja laittanu valkkeet kalkkikiviaskelheet.
Askelheet saathiin nimen Pamukkale, mikä meinaa pumpulilinnaa turkiksi.
1 / 2
Pamukkale i Tyrkia
3. Burj Khalifa | Dubai
Mikä pytinki oon mailman korkkein? Mittaamako met sen pytingin korkkeiman kohđasta? Vai oonko sen mitathaan korkkeimasta etaasista joka oon piđossa? Ja mikä pytinki oikkeestansa oon?
Ko Dubain Burj Khalifan pykäthiin, ei tästä tarvinu enämpi tingata. Tämä pytinki oli korkkein kaikessa. Korkkein pytinki, korkkein etaasi joka oon piđossa, hermostunheimat klasinpessiijät. Siinä oon asunttoi, kontturiita, basenkkiita ja restauranttiita.
Burj Khalifa oon 828 meetterii korkkee. Se oon yli kaksi kerttaa korkkeempi ko aijempi korkkein pytinki, Taipei 101.
Katto näitä reikäpäitä jokka hyppäävät lentotuukila Burj Khalifalta:
1 / 3
Burj Khalifa i Dubai
4. Petra | Jordan
Petra oon Jebel al-Madhbah-vaaran vieressä Punaisenmeren ja Kuolheenmeren välissä. Tämä oon maaginen kaupunki jonka oon laitettu roosanfärisistä kivistä.
Petran asutethiin 11 000 vuotta aikkaa. Sen alethiin pykkäämhään kunnola vasta ko arabialaiset nomaadit asetuthiin alale vuona 400 e.Kr. Heistä tuli rikkhaat ko kauppareitit kuljethiin heiđän maan poikki.
Nomaadit kaupathiin silkilä, höystheilä ja pumpulilla. Het luothiin mahtaavan kaupungin minkä tunnethaan sen kaunhiista pytingiistä ja haakiista.
1 / 3
Petra i Jordan
5. Ha Long-lahti | Vietnam
Vietnamissa sanothaan ette jumalat oon luonheet Ha Long-lahđen saaret. Suuret konttoskulptuurit nousseevat turkiisista veđestä. Ko taivas aukenee ja aurinko tullee framile, se tunttuu siltä ko met tuijottaisima itte mailman luomista.
Legenda muistelee ette vietnamilaissii vasthaan hyökäthiin pohjaisesta, ja ette Muoridraakin ja hänen kläpit lähätethiin auttamhaan.
Taistelun aikana sytytethiin draakit palamhaan. Net syljethiin paljon jalokivvii mikkä formathiin puolustusmuurin. Tämä suojeli maata pohjaisen hyökkäyksiltä ijänkaikkisesti. Jalokivistä tuli maisema ja saaret mikkä oon vieläki Ha Long-kopan rannikolla.
Nuoin 1000 ihmistä assuu talovenheissä Ha Long-kopassa. Talovenheet näyttäävät histooriallista elämäntappaa.
1 / 2
Ha Long-bukta i Vietnam
6. Taj Mahal | Intia
Taj Mahal oon yksi mailman kaunhiimista pytingiistä. Pytinkhiin kuuluu kans kaunis rakkaustarina.
Taj Mahal oon yksi mailman seittemestä ihmheestä, ja yli seittemen miljuunaa ihmistä tullee joka vuosi kattomhaan pytinkkii.
Tämän fantastisen pytingin pykkääminen kesti 22 vuotta. Se oon 73 meetterii pitkä, ja sen oon täkätty kilttäävällä marmorilla ja jalokivilä.
Shahin vaimo Mumtaz Mahal kuoli ko hän synnytti heiđän 14. lasta vuona 1631. Shahi kehäytti Taj Mahalin vaimon ijänkaikkiseksi lepopaikaksi, ja se oon symbooli heiđän rakkhauđelle.
1 / 2
Taj Mahal i India
7. Angkor Wat | Kambodsja
Kaupunki Angkor oli kauvon aikkaa sitte Khmer-riikin pääkaupunki. Kaupungin tunnethaan sen mystisistä temppeliistä.
Kambotsan jumalakuninkhaat pykäthiin jatkuuvasti fiinimppii pytinkkiitä ko het haluthiin näyttäät kuinka mahtaavat het olthiin.
Angkor Wat oon temppeliistä suuriin, ja se oon hyvin säilyny hindutemppeli. Sen pykäthiin 1100-luvun alussa. Siinä oon viisi tornii jokka näkkyyvät yli kilomeetterin päähän.
1 / 2
Angkor Wat i Kambodsja
8. Kiinan muuri | Kiina
Yksi mailman tunnetuimista assiista oon Kiinan muuri. Ko sie käyt sielä, saat muiston loppuijäksi.
Muuri oon puolentoista tiiman päässä Beijingistä ja oon nuoin 21 000 kilomeetterii.
Pykkäämisen aloitethiin vuossiin 700 ja 400 e.Kr välissä. Silloin eri kiinalaiset staatit pykäthiin omat muurit siksi ette saatethiin puolustaat ittensä.
Kiinan ensimäinen keisari, Qin Shi Huang, yhđisti muurit kolmanella vuosisađala e.Kr. Moolina oli estäät hyökkäyksen pohjaisesta.
1300-1600-luvuila pykäthiin vahtitornii ja fästinkkiitä niin ette muuri olis ollu vieläki parempi.
Monet kuolthiin ko muurii pykäthiin. Se sanothaan, ette heiđät hauđathiin muurin sisäle.
Muuri ei topanu kaikkii viholissii. Djengis Khan pääsi muurin läpitte ja valtas Pohjais-Kiinan 1200-luvun alussa. Hänen lapsenlapsi, Kublai Khan, valtas Etelä-Kiinan vuona 1279.
1 / 3
Den kinesiske mur
Lähtheet:
- 101 steder du må oppleve (før du dør) (2020)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images / Skydive Dubai – Youtube
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
