1. Sinun engelskan taito paranee

Paljoissa peliissä sie häyđyt lukkeet ohjheita ja chattaila muitten pellaajiitten kans engelskaksi. Silloin sinun kielitaiđot paraneeva ilman ette sie hunteeraat sitä. Joileki tullee engelskasta heiđän uusi favorittifaaki koulussa ko heistä oon tulheet niin seppä siinä.

2. Olet sosiaalinen ja saat uussii ystäviitä

Paljoissa peliissä sie häyđyt tehä yhtheistyötä muitten kans kekkä oon eri maista pois. Teistä tullee joukko mikä kuuluu yhtheen. Piian sie olet tärkkee persoona pelissä jolleki kenelä ei ole niin paljon ystäviitä entisestä?

3. Sie tulet seppä ratkaisemhaan vaivoi eli probleemiita

Sie tulet seppä tekemhään yhtheistyötä ja ratkaisemhaan probleemiita. Sie häyđyt hunteerata etikkii. Piian sinun päätös vaikuttaa yhđen kaupungin assuujiitten elämhään, tahi yhđen karakteerin tulleevaisuutheen?

Sie häyđyt hunteerata strategiita ja taktikkii. 

Kunka hankit parhaimat kamppheet? Kunka voitat viholisen mahđolissiiman noppeesti?

4. Motooriset kyvyt

Ko sie pellaat daattapellii, sie häyđyt olla happela ja seppä sormista, ja sie häyđyt pittäät kumppaaki kättä samhaan aikhaan. Sinun silmä-käsi-koordanisuuni kans eđistyy. Nämät saatethaan olla hyvät kyvyt kymnastikkitiimoissa.

5. Sie opit hallittemhaan stressii

Profesunellit daattapelin pellaajat eli gamerit kojethaan yhtä paljon stressii ko racerpiilin ajjaajat. Se oon kyllä villi ajatus! Hobbigaming ei ole yhtä vaattiiva, mutta sie kojet vähäsen samasta stressistä. Sie saat trääninkkii siinä ette pyssyyt rauhalisena ja tehä tehtäviitä stressaamatta. Nämät kokemukset oon hyvä ottaat myötä uushiin situasuunhiin.

6. Träänätä tuntheita

Ko sie pellaat kauvoin, sie träänäät tuntheita niin ko empatiita, katumista, ylppeyttä, tytyväisyyttä, engasementtii, toivottomuutta, hermostunheisuutta, panikkii, sekanusta, eppäilystä, ärrytystä ja katkeruutta.